Benvignûts te home page dal progjet Biblioteche furlane virtuâl, inmaneât de Biblioteche Civiche “Vincenzo Joppi” di Udin e de Societât Filologjiche Furlane, cu la poie de Agjenzie regjonâl pe lenghe furlane (ARLeF).
Il progjet, che al cjate lis sôs lidrîs te tradizion bibliografiche furlane dal Votcent, si propon di cjapâ sù, catalogâ e meti a disposizion di ogni utent de rêt lis informazions sù la produzion a stampe, o suntun supuart diviers, di lavôrs in lenghe furlane o sù la lenghe furlane.
Dongje dal portâl informatic, al vignarà publicât ancje un Boletin cu la rassegne bibliografiche dai lavôrs burîts fûr in chest setôr, dât fûr sore nuie par dut il Friûl.
L’obietîf de racuelte e de schedadure de produzion in lenghe furlane e sù la lenghe furlane al è dal sigûr une vore impegnatîf: al sarà pussibil rivâ a risultâts bogns dome cu la colaborazion di ducj i sogjets interessâts, in primis autôrs e editôrs, ma ancje i Ents locâi, lis Istituzions, lis Scuelis e lis Associazions.